വീണ്ടും തിരഞ്ഞെടുപ്പ് അടുക്കുന്നു. രാഷ്ട്രീയക്കാരുടെ നെട്ടോട്ടം തുടങ്ങി. സീറ്റ് കയ്യിലുള്ളവര്ക്ക് അത് നഷ്ടപെടാതിരിക്കാനും, ഇല്ലാത്തവര്ക്ക് അത് കയ്യിലാക്കാനും ഉള്ള കളികള്ക്കായി കരുക്കള് നീക്കി തുടങ്ങി. ഈ കാലയളവിലെങ്കിലും ഈ ആളുകള് സമ്മതീദായകരായ പൊതുജനങ്ങളെ ഓര്ക്കുമല്ലോ. അഞ്ചുവര്ഷം കൂടുമ്പോള് ഒരിക്കലാണ് നമ്മള് രാജകീയ പദവി ഉള്ളവരാണ്എന്നുള്ള ഒരു തിരിച്ചറിവ് എങ്കിലും ഉണ്ടാകുന്നത്. അതു വരെ രാഷ്ട്രീയക്കാരുടെ കുതികാല് വെട്ടലിനെ പഴിച്ചും,നമ്മുടെ ദൌര്ഭാഗ്യത്തെമാറോടണച്ചും,അടുത്ത സര്ക്കാര് വരുമ്പോള് ഉണ്ടാവും എന്നു പ്രതീക്ഷിക്കപ്പെടുന്ന പാലൊഴുകുന്ന തോടിനെ പറ്റി ചിന്തിച്ചും സമയം പോക്കുന്നു. തിരഞ്ഞെടുപ്പാകുമ്പോള് ചൂടുപിടിക്കുന്ന അന്തരീക്ഷത്തിലെ വാഗ്വാദങ്ങളിലേക്കും നമ്മള് എടുത്തെറിയപ്പെടുന്നു. ഇപ്പോഴത്തെ തിരഞ്ഞെടുപ്പിലെങ്കിലും നാം നമ്മുടെ നേതാക്കളോട് ചോദിക്കേണ്ട ചില ചോദ്യങ്ങളുണ്ട്. നാം പലപ്പോഴും ചോദിക്കുവാന് ആലോചിക്കുകയും,സമയം വരുമ്പോള് മനപൂര്വ്വം മറക്കുകയും ചെയ്യുന്ന ചില ചോദ്യങ്ങള്. ഞാന് തിരഞ്ഞെടുത്ത് ലോകസഭയിലേക്കോ,നിയമസഭയിലേക്കോ അയക്കുന്ന ആള് എന്റെ നാടിനു വേണ്ടി എന്തു ചെയ്തു. ...